ساپا مائارىپىنى ئومۇملاشتۇرۇپ، ناھىيەمىزنىڭ ئوقۇ-ئوقۇتۇش سۈپىتىنىڭ يۇقىرى كۆتىرىلىشىنى ئىلگىرى سۈرۈش ئۈچۈن، ناھىيەلىك پارتكوم، ناھىيەلىك خەلق ھۆكۈمىتى 2010-يىلدىن باشلاپ ” ئوقۇتۇش مۇكاپات فوندى“ نى ناھىيە مالىيە خامچوتىغا كىرگۈزۈپ، ھەريىلى 100 مىڭ يۈەن خىراجەت ئاجرىتىپ مائارىپ ئوقۇتۇشىدا ئىلغار نەتىجىلەرنى قولغا كەلتۈرگەن  بىرىنچى سەپتە خىزمەت قىلىۋاتقان ئوقۇتقۇچىلارنى تەربىيلەش ئۈچۈن ئىشلىتىشنى قارار قىلدى.

      ئىگەللىنىشچە، لوپنۇر ناھىيەسىنىڭ ” ئوقۇتۇش مۇكاپات فوندى“ دا جەمئىي بەش باسقۇچ تەسىس قىلىنغان بولۇپ، ئۇلار بالىلار باغچىسى باسقۇچى، باشلانغۇچ مەكتەپ باسقۇچى، تولۇقسىز ئوتتۇرا مەكتەپ باسقۇچى، كەسپىي تېخنىكا تەربىيلەش مەركىزى باسقۇچى، تولۇق ئوتتۇرا مەكتەپ باسقۇچىدىن ئىبارەت. بىرىنچى سەپتە خىزمەت قىلىۋاتقان ئوقۇتقۇچىلارنىڭ ھەقىقىي نەپكە ئېرىشىشىگە كاپالەتلىك قىلىش ئۈچۈن، ئوقۇتۇش مۇكاپات فوندى مەكتەپتىكى ئوتتۇرا قاتلامدىن يۇقىرى رەھبەرلەرنى ئۆز ئىچىگە ئالمايدۇ. نۆۋەتتە، ناھىيەمىزنىڭ ئوقۇتۇش مۇكاپات فوندىنىڭ ئومۇمىي تەقسىمات لايىھەسى ھەربىر باسقۇچتىكى ئوقۇتۇش مەزمۇنى، ۋەزىپىسى، نىشان ۋە ئىجتىمائىي ئۈنۈمنىڭ ئوخشىماسلىقى بويىچە تۈزۈپ بولۇندى، مەكتەپلەر ئومۇمىي تەقسىمات لايىھەسى بويىچە مۇناسىپ بولغان تەقسىمات تەپسىلىي قائىدىلىرىنى بېكىتىدىغان بولۇپ، مۆلچەرىمىزچە 2009-2010-يىللىق مۇكاپات فوندى 9-ئايدا ئوقۇش باشلانغاندىن كېيىن ئەمىللىشىدۇ.

      يېقىنقى يىللاردىن بۇيان، ناھىيەلىك پارتكوم، ناھىيەلىك خەلق ھۆكۈمىتى ”ئىككى ئاساسەن“ بويىچە ”دۆلەت تەكشۈرۈش“ نى كۈتىۋېلىش خىزمىتىنى ئاچقۇچ قىلىپ، مائارىپ بايلىقىنى بىرىكتۈرۈش ۋە مائارىپقا بولغان سېلىنما سالمىقىنى زورايتىپ، ناھىيە تەۋەسىدىكى مەكتەپلەرنى ئەسلىدىكى 35 تىن 9 غا يىغىنچاقلىدى، 160 مىليون يۈەن مەخسۇس مەبلەغ توپلاپ ۋە قولغا كەلتۈرۈپ ئوقۇتۇش شارائىتىنى ياخشىلاشقا ئىشلەتتى، ئوقۇ-ئوقۇتۇش ئۈسكۈنە-ئەسلىھەلىرىنى تولۇقلىنىپ سەپلىنىپ، ئۇل مائارىپ ئاساسىي جەھەتتىن قېلىپلىشىپ ۋە ئۆلچەملىشىپ، ھەرمىللەت كادىر ئاممىسىنىڭ ئەلا مائارىپتىن بەھرىمان بولۇش ئېھتىياجىنى ئاساسىي جەھەتتىن قاندۇرالايدىغان بولدى.