باش شۈجى خۇجىنتاۋنىڭ داشى كەنتىدىكى ياشلارغا جاۋاب خەت يازغانلىقىنىڭ بەش يىللىق مۇناسىۋىتى بىلەن، 5-ئاينىڭ 4-كۈنى، شىنجاڭ خەلق رادىئو ئىستانسىسى ئۇيۇشتۇرغان، ناھىيىلىك پەن-تېخنىكا ئىدارىسى ئۇيۇشتۇرۇشقا ياردەملەشكەن پەن-تېخنىكىنى يېزىلارغا يۈزلەندۈرۈش بويىچە نەق مەيداندا مەسلىھەت بېرىش بىۋاستە ئاڭلىتىش پائالىيىتى ناھىيىمىزنىڭ داشى كەنتىدە ئېلىپ بېرىلدى. ئاپتونوم رايونلۇق دېھقانچىلىق، باغ-ئورمانچىلىق، چارۋىچىلىق، يېزا-ئىگىلىك ماشىنىلىرى قاتارلىق ساھەلەردىن كەلگەن مۇتەخەسسىسلەر، مۇئاۋىن ھاكىم مەخمۇت ساۋۇر ھەمدە داشى كەنتىدىكى دېھقان-چارۋىچى ئامما بولۇپ 150 تىن ئارتۇق ئادەم پائالىيەتكە قاتناشتى.
پەن-تېخنىكىنى يېزىلارغا يۈزلەندۈرۈش بويىچە نەق مەيداندا مەسلىھەت بېرىش پائالىيىتىدىن كۆرۈنۈش
بىر سائەت داۋام قىلغان پائالىيەت داۋامىدا، ئاپتونوم رايوندىن كەلگەن ئالاقىدار مۇتەخەسسىسلەر ئىلمىي ئۇسۇلدا باقمىچىلىق قىلىش، كېسەللىكلەردىن مۇداپىئەلىنىش، باغۋەنچىلىكنى يۇقۇرى ھوسۇللۇق يىتىشتۈرۈش، زىيانداش ھاشارەتلەرنىڭ ئالدىنى ئېلىش داۋالاش، يېزا-ئىگىلىك ماشىنىلىرىنى ئاسراش ۋە رېمونت قىلىش، يېزا-ئىگىلىكىنىڭ كىرىمىنى ئاشۇرۇپ، دېھقانلارنىڭ كىرىمىنى كۆپەيتىش قاتارلىق تەرەپلەردىكى مەسىلىلەردە دېھقان-چارۋىچى ئامما بىلەن ئۆز-ئارا پىكىر ئالماشتۇردى، ھەمدە بۇ نومۇر شىنجاڭ تەۋەسىدە بىۋاستە ئاڭلىتىلدى.
ئۆز-ئارا پىكىر ئالماشتۇرۇش، سورالغان سوئاللارغا نەق مەيداندا جاۋاب بېرىش ئۇسۇلى ئارقىلىق، دېھقان-چارۋىچى ئاممىنىڭ ئىشلەپچىقىرىش تۇرمۇشىدىكى ئەندىشىسى ئۈنۈملۈك ھەل قىلىنىپ، كەڭ دېھقان-چارۋىچى ئاممىنىڭ «ئىلىم-پەننى ئۆگىنىش، ئىلىم-پەندىن پايدىلىنىش» ئاكتىپلىقى زور كۆلەمدە قوزغىتىلىپ، پەن-تېخنىكىنى ئومۇملاشتۇرۇشتەك ياخشى ئۈنۈم قولغا كەلتۈرۈلدى.
