ب د ت سانائەت تەرەققىيات تەشكىلاتىنىڭ يېقىندا ئېلان قىلغان دوكلاتىدا مۇنداق دېيىلدى: جۇڭگو ياساش كەسپىنىڭ 172 تۈرلۈك مەھسۇلاتى دۇنيا بويىچە 1 – ئورۇنغا ئۆتتى، دۇنيادىكى %70 تېلېفون، ئاياغ كىيىم، ئۈچتىن بىر قىسىمدىن كۆپ تېلېۋىزور، ئورۇ ساندۇق جۇڭگودا ياسالدى، جۇڭگو ياساش كەسپى قوشۇلما قىممىتىنىڭ دۇنيا ياساش كەسپى قوشۇلما قىممىتىدە ئىگىلىگەن نىسبىتى %11.44 بولدى.

   دوكلاتتا: ھازىر تەننەرخ ئىزچىل ئۆرلەۋاتقان ئەھۋالدا، جۇڭگو ياساش كەسپىنىڭ سېلىشتۇرما ئەۋزەللىكى كۈچىنى يوقاتمىدى، بۇ ئەۋزەللىك خېلى ئۇزاق مەزگىلگىچە داۋاملىشىدۇ. جۇڭگو ياساش كەسپىنىڭ يەر شارى ئىقتىسادىغا سىڭىپ كىرىش سۈرئىتىنىڭ تېزلىشىشى ئوبيېكتىپ جەھەتتىن پۇل پاخاللىقىنىڭ يەر شارى مىقياسىدا يامراش سۈرئىتىنى ئاستىلاتتى، دېيىلدى.

    ئىگىلىنىشىچە، ئېلىمىز ياساش كەسپىدىكى نۇرغۇن مەھسۇلاتنىڭ مىقتارى ئۇزاق مەزگىلدىن بۇيان دۇنيا بويىچە 1 – ئورۇندا تۇرغان، ئەمما ئاشۇرما قىممەت سەل تۆۋەن بولۇش بىلەن بىللە، مۇستەقىل بىلىم مۈلۈك ھوقۇقىغا ئىگە مەھسۇلات نىسبىتى سەل ئاز بولغان، جۇڭگو ياساش كەسپىنىڭ سېلىشتۇرما ئەۋزەللىكى، ئاساسلىقى، تۆۋەن تەننەرخ جەھەتتە ئىپادىلەنگەن. ھالبۇكى يېقىنقى يىللاردىن بۇيان، ئېلىمىز ياساش كەسپىدىكى تۈرلۈك مۇھىم ئامىل تەننەرخنىڭ سىجىل ئېشىشى، شۇنىڭدەك خەلق پۇلى قىممىتىنىڭ ئېشىشى قاتارلىق ئامىللار جۇڭگو ياساش كەسپىنى يۇقىرى تەننەرخ دەۋرىگە تەدرىجىي باشلاپ كىرمەكتە.

    مۇتەخەسسىسلەر مۇنداق كۆرسەتتى: ھازىرقى ياساش تۈرىدىكى مۇھىم ئامىل تەننەرخنىڭ سىجىل ئۆرلىشىدەك ئوبيېكتىپ رېئاللىق ئالدىدا، ئېلىمىز كەسپ قۇرۇلمىسىنى تەڭشەپ ۋە سەرخىللاشتۇرۇپ، ياساش كەسپى بىلەن ئۇچۇر كەسپى، مۇلازىمەت كەسپىنى بىرلەشتۈرۈشنى ئىلگىرى سۈرۈپ، ئۆز ئالدىغا يېڭىلىق يارىتىشقا تۈرتكە بولۇپ، جۇڭگو ياساش كەسپىنىڭ خەلقئارادىكى رىقابەت كۈچىنى ئاشۇرۇش كېرەك.